Данок за немажени и неженети во Македонија? Мицкоски најави драстични мерки за спречување на демографската криза!

Македонскиот премиер Христијан Мицкоски најави радикални мерки како одговор на влошената демографска слика – меѓу нив и можноста за воведување данок за немажени и неженети лица.

На дебата во Владата посветена на демографските предизвици, Мицкоски изјави дека Македонија се соочува со алармантен пад на населението:

„За четири години изгубивме над 33.000 жители – како да исчезна град колку Кавадарци или Кичево. Стапката на наталитет постојано опаѓа, се раѓаат сѐ помалку деца, а сѐ повеќе луѓе остануваат сами.“

Во 2024 година се родиле само 16.061 деца, а починале 20.201 лице, што претставува природен пад од 4.140 луѓе во една година.

Воведување на данок за самци?

Мицкоски рече дека Владата сериозно размислува за дополнителен данок за оние кои не стапиле во брак. Целта е поттикнување на формирање семејства, за да се прекине долгорочниот пад на населението.

„Нема магично решение, но има државничка борба. Време е да изградиме држава каде мајчинството е благослов, а не товар, каде што надежта ќе биде поважна од пасошот“, истакна премиерот.

Проблем што го тресе и Европа

Македонија не е единствена соочена со оваа криза – слични трендови има во Германија, Италија, Бугарија, Јапонија и Јужна Кореја. Но, Мицкоски предупредува:

„Додека кај другите ова е тренд, кај нас е аларм. Во многу села веќе нема ни прво одделение.“