Челси инкасираше милиони: Откриено колку заработи од Светското клупско првенство

Челси инкасираше 116 милиони евра од Светското клупско првенство – финансиска инјекција во вистински момент

Фудбалскиот клуб Челси доби значајна финансиска поддршка по својот настап на првото издание на новоформираното Светско клупско првенство, организирано од ФИФА. Иако „сините“ во последните преодни рокови се еден од клубовите со највисоки трошоци на трансфер пазарот, оваа заработка ќе помогне во олеснување на притисокот околу финансискиот фер-плеј, за кој клубот веќе доби опомена од УЕФА.

По освојувањето на Конференциската лига, Челси додаде уште еден трофеј во својата витрина, победувајќи во финалето на Светското клупско првенство и носејќи дома не само слава, туку и рекордна заработка од 116 милиони евра.

Според официјалната распределба:

• 40 милиони евра му следуваат на клубот за победата во финалето против актуелниот европски шампион.
• 30 милиони евра беа обезбедени со самото пласман на завршниот меч.
• Остатокот од 46 милиони евра е заработка низ групната и елиминациската фаза на турнирот.

Иако поради полошиот коефициент, Челси не можеше да парира со групната заработка на гигантите како Реал Мадрид, ПСЖ и Баерн Минхен, Лондонскиот клуб го надомести тоа преку импресивен настап во елиминациската фаза и на крајот заминува од САД како клуб со најголема вкупна добивка од турнирот.

Оваа финансиска инјекција доаѓа во клучен момент за „сините“, кои веќе планираат нови засилувања, но сега со подобра контрола врз финансиската рамнотежа.