Скандал во Шпанија: Јамал ангажирал лица со џуџест раст за роденденска забава

Ламин Јамал, младата фудбалска ѕвезда на Барселона, неодамна го прослави својот 18-ти роденден со голема забава на која присуствуваа бројни соиграчи и пријатели. Роденденската прослава, која се одржа изминатиот викенд и собра околу 100 гости, предизвика голем скандал во шпанската јавност.

Според шпанските медиуми, на забавата било строго забрането користење на мобилни телефони и снимање, но сепак, фотографии од пред роденденското случување излегоа во јавноста. На нив се гледа дека Јамал за роденденот ангажирал лица со џуџест раст, што предизвика силен револт кај јавноста и здруженијата за права на лица со инвалидитет.

Шпанската Асоцијација за личности со ахондроплазија и други коскени дисплазии (АДЕЕ) осуди таквата практика и најави дека ќе преземе правни чекори против фудбалерот, со цел да се заштити достоинството на лицата со инвалидитет и да се зачуваат вредностите на еднаквост и почит во општеството.

Претседателката на АДЕЕ, Каролина Пуенте, изјави:
„Апсолутно е неприфатливо во 21 век лица со џуџест раст да се користат како забавни атракции на приватни настани.“

Скандалот отвори голема дебата во шпанското општество за правата и почитувањето на лицата со посебни потреби и значењето на социјалната одговорност на јавните личности.