Планирано проширување на граничниот премин Прешево: Србија најавува повеќе ленти за побрз сообраќај

Прешево ќе добие 23 нови ленти – Граничниот премин кон Македонија се проширува за побрз проток и поголема безбедност

Граничниот премин Прешево, најфреквентниот коридор меѓу Србија и Македонија, во наредниот период ќе биде целосно модернизиран и проширен. Планот предвидува изградба на дури 23 сообраќајни ленти, со цел значително да се намалат редиците, особено во пиковите на летната сезона.

Проширувањето е дел од Просторниот план што го објави српската Агенција за просторно планирање и урбанизам. Според проектот, ќе се обновуваат патничките и стоковните царински терминали, а просторот на преминот ќе се прошири на околу 17 хектари. Најголема новина е токму зголемувањето на бројот на ленти, што ќе овозможи побрза и поефикасна контрола, во согласност со европските стандарди.

За камионскиот сообраќај, планирани се четири засебни ленти, физички одделени од патничките возила. Со ова ќе се елиминира мешањето на тешкиот транспорт со останатиот сообраќај, со што ќе се намалат чекањата и метежот. Дополнително, ќе се применуваат мобилни флексибилни бариери, за прилагодување на протокот во екстремни услови, како за време на празници или враќање на гастарбајтерите.

Во планот е и преместување и реконструкција на административната зграда, санитарните јазли, поштенската и телекомуникациската канцеларија, како и објектите за инспекција на патнички возила. Со овие подобрувања, ПРЕШЕВО ќе стане помодерен, побезбеден и поефикасен премин, од што директна корист ќе имаат и граѓаните и економијата.

Очекувањата се дека модернизацијата ќе донесе побрз проток на движење, подобрена безбедност и олеснета трговија и туризам во регионот.