Отстранета дивата депонија меѓу Ростуше и Велебрдо – Општина Маврово и Ростуше со јасна порака до граѓаните

Општина Маврово и Ростуше продолжува со континуирани активности насочени кон подобрување на јавната хигиена и заштитата на животната средина. Во рамки на тие активности, беше успешно реализирана акција за расчистување на дивата депонија лоцирана помеѓу населените места Ростуше и Велебрдо.

Акцијата беше спроведена по насока на градоначалникот Онер Јакупоски, а општинските служби отстранија значителни количини отпад кои со месеци го нарушуваа изгледот на регионот и претставуваа сериозна закана за животната средина и здравјето на жителите.

Од Општината истакнуваат дека ваквите диви депонии не само што го нарушуваат природниот амбиент, туку се и потенцијален извор на загадување на почвата и водата.

Истовремено, Општина Маврово и Ростуше упатува апел до сите граѓани за одговорно и совесно однесување при одлагање на отпадот. Сметот и градежниот шут мора да се депонираат исклучиво на официјално утврдените локации, определени со одлука на Советот на Општината.

Секое несовесно фрлање отпад на јавни површини директно влијае врз квалитетот на животот, здравјето на граѓаните и изгледот на општината.

Општината најавува дека и во иднина ќе продолжи со вакви акции, но потенцира дека грижата за природата е заедничка одговорност.