Бен Афлек го продаде својот AI стартап на Netflix за 600 милиони долари

Холивудскиот актер Бен Афлек направи голем бизнис надвор од филмската индустрија, откако неговиот стартап за вештачка интелигенција InterPositive беше купен од стриминг гигантот Netflix за сума која се проценува на околу 600 милиони долари.

Договорот вклучува и интеграција на целиот тим на стартапот во Netflix. Сите 16 инженери и креативци кои работеле на проектот ќе преминат во компанијата, додека Афлек ќе има улога на виш советник во понатамошниот развој на технологијата.

Продажбата предизвика бројни реакции на социјалните мрежи. Дел од јавноста го критикува актерот, потсетувајќи на неодамнешните штрајкови на холивудските актери и сценаристи кои протестираа токму против користењето на вештачка интелигенција во филмската индустрија.

Некои коментари сугерираат дека ваквиот потег е контрадикторен со барањата на актерите за заштита на човечкиот труд, додека други сметаат дека станува збор за паметен деловен чекор во време кога технологијата и забавната индустрија сè повеќе се поврзуваат.

Иако засега не е објавено како точно Netflix ќе ја користи технологијата на InterPositive, експертите веруваат дека вештачката интелигенција може да игра значајна улога во продукцијата, анализа на публика и создавање содржина во иднина.

Во меѓувреме, Афлек се подготвува за враќање на филмското платно со продолжението на акциониот трилер „The Accountant 2“, што покажува дека актерот паралелно гради и успешна кариера во бизнис и технологија.