Маврово и Ростуше ќе биде домаќин на Светското првенство во риболов на крап 2026 година

Денеска беше официјализирана соработката за еден од најголемите спортски настани што ќе се одржат во нашиот регион.

Градоначалникот на Општина Маврово и Ростуше, Онер Јакупоски, Директорот на НП Маврово, Харис Ибраими, и Филип Серафимовиќ, Претседател на Македонската риболовна федерација (МРФ), потпишаа Меморандум за соработка за организација на Светското првенство во риболов на крап – Мавровско Езеро 2026.

Со овој меморандум се воспоставува цврсто стратешко партнерство помеѓу локалната самоуправа, Националниот парк и Федерацијата, со цел беспрекорна техничка и логистичка реализација на првенството.

Главниот фокус на оваа иницијатива е:

Промоција на Општина Маврово и Ростуше како елитна европска дестинација за спортски и еко-туризам.

Меѓународна афирмација на Општина Маврово и Ростуше, и нејзините природни богатства.

Поттикнување на локалниот економски развој преку привлекување на голем број натпреварувачи и посетители од целиот свет.

Организацијата на ваков настан од светски ранг е потврда за капацитетите на Мавровското Езеро и заедничката посветеност за развој на алтернативните форми на туризам кои се во хармонија со природата.

Градоначалникот Јакуповски изјави дека “Светското првенство е еден несекојдневен настан кој ние силно го поддржуваме затоа што носи големи бенефити за нашата општина.

Локалната економија и туризам ќе имаат големи придобивки.

Јас лично и службите на општината ќе бидеме постојано во функција на поддршка на овој настан.

Ги замолувам локалните капацитети да бидат подготвени, граѓаните да бидат трпеливи во денови на поголеми гужви и гостопримливи кон сите гости во нашиот крај.

Да се покажеме како добри домаќини и да го презентираме мавровскиот крај како еден од бисерите на Македонија.

Извор: Фејсбук страна на Општина Маврово и Ростуше