Крузерот со хантавирус евакуиран: СЗО предупредува дека опасноста сè уште не е завршена

Светската здравствена организација предупреди дека ситуацијата со хантавирусот сè уште внимателно се следи, иако беше успешно спроведена евакуацијата на патниците и екипажот од крузерот MV Hondius.

Генералниот директор на СЗО, Тедрос Аданом Гебрејесус, изјави дека „работата не е завршена“, посочувајќи дека поради долгиот период на инкубација на вирусот, можно е во следните недели да се појават нови случаи.

Крузерот пловел од Канарските Острови кон Холандија, а по појавата на случаи на инфекција со хантавирус била организирана евакуација на повеќе од сто патници и членови на екипажот од дваесет различни земји.

Од СЗО препорачуваат сите лица кои биле изложени на ризик да останат под активен здравствен надзор или во домашен карантин 42 дена од последниот контакт со вирусот.

И покрај загриженоста, здравствените власти нагласуваат дека ризикот за глобалната популација засега останува низок. Сепак, институциите продолжуваат со следење на состојбата и спроведување превентивни мерки за да се спречи евентуално ширење на инфекцијата.

Во меѓувреме, шпанските власти потврдија дека кај дел од патниците се појавиле благи симптоми, но засега нема информации за сериозно влошување на здравствената состојба.