Ужас во Германија: Авион експлодирал во воздух, делови паднале врз станбена област

Голема трагедија ја потресе Германија откако мал авион експлодирал во воздух, а делови од леталото паднале врз станбена област, предизвикувајќи паника меѓу жителите и масовна интервенција на спасувачките служби.

Според првичните информации од германските медиуми, пилотот претходно пријавил технички проблеми со моторот и се обидувал принудно да слета, но кратко потоа дошло до експлозија на леталото.

Делови од авионот паднале во близина на станбени објекти, при што избувнал пожар, а жителите од околните куќи биле евакуирани од безбедносни причини. На терен веднаш пристигнале пожарникари, полиција и екипи на итната помош.

Германските власти засега не соопштуваат официјален број на жртви или повредени, додека истрагата за причините за несреќата е во тек. Според медиумите, несреќата се случила во покраината Северна Рајна-Вестфалија.

Очевидци за локалните медиуми изјавиле дека слушнале силна експлозија, по што на небото се појавил густ чад, а делови од леталото биле расфрлани на повеќе локации во населбата.

Надлежните служби апелираат граѓаните да ја избегнуваат областа додека трае увидот и расчистувањето на теренот.