Работна средба на градоначалникот Онер Јакупоски со амбасадорката Н.Е. Џаинг

Градоначалникот на Општина Маврово и Ростуше, м-р Онер Јакупоски, оствари работна средба со Амбасадорката на Народна Република Кина во Р. Македонија, Н.Е. Џаинг Сјаојан.

Средбата помина во пријателска и конструктивна атмосфера, отворајќи нови перспективи за развој и поврзување.

Главен фокус на разговорите беше ставен на огромните туристички капацитети со кои располага Мавровско-Реканскиот крај.

За време на средбата детално беа презентирани природните убавини, уникатните предели и сите можности за алтернативен, зимски и летен туризам кои ги нуди самата општина како една од најатрактивните дестинации во регионот.

Паралелно со туризмот, градоначалникот се осврнаа и на богатите културни и традиционални вредности по кои е препознатливо локалното население.

Градоначалникот Јакупоски ја запозна амбасадорката со автентичното наследство на овој крај, нагласувајќи дека токму мултикултурализмот и вековните традиции се нашата најголема гордост и потенцијал за меѓународна промоција.

На средбата се отворија и прашањата за идните можности за соработка меѓу Општина Маврово и Ростуше и Амбасадата на НР Кина, пред сè во делот на привлекување странски туристи, културна размена и потенцијални инвестиции во локалната економија.

Двете страни изразија силна подготвеност за одржување на континуиран дијалог со цел конкретизирање на иницијативите кои ќе донесат бенефит за целата заедница.