„Мицкоски: Европа сфати дека уставните измени не се клучниот проблем, Филипче: Доживеавме дипломатски неуспех“

Премиерот Христијан Мицкоски изјави дека е направен прв чекор во заштитата на македонскиот јазик и културен идентитет, откако Комисијата за надворешна политика на Европскиот парламент го усвои извештајот за Македонија, без придавката „модерен“ пред македонскиот јазик.

„Борбата беше напорна, но конечно се виде дека проблемот не е само внесувањето на неколкумина Бугари во Уставот – темата е многу подлабока,“ рече Мицкоски. Тој додаде дека не може со сигурност да каже дали извештајот ќе помине на пленарна седница, но очекувал дека амандманите ќе бидат предложени токму од ЕПП, каде припаѓа сестринската партија на ВМРО-ДПМНЕ.

Од друга страна, лидерот на СДСМ, Венко Филипче, во изјава за ТВ 24 ја поздрави поддршката на извештајот, но нагласи дека Македонија доживеала дипломатски неуспех. Според него, амандманот за „модерен македонски јазик“, поднесен од европратеници блиски до ВМРО-ДПМНЕ, претставува пораз за државната надворешна политика и срам за македонската дипломатија.

Слични реакции дојдоа и од коалицискиот партнер на СДСМ – ДУИ. Потпретседателот на партијата, Бујар Османи, изјави дека усвојувањето на извештајот од страна на Комисијата практично ја потврдува веќе постоечката преговарачка рамка, во која македонскиот јазик и идентитет се веќе вклучени. Тој потсети и на потпишувањето на ФРОНТЕКС договорот, каде се користи кратенката МКД.

Извештајот на европратеникот Томас Вајц беше изгласан во втор обид, откако првично беше одложен. Премиерот Мицкоски упати апел до СДСМ и другите политички чинители да ги убедат своите сестрински партии во ЕУ за поддршка на македонските позиции.