„Тинејџер уапсен поради смртни закани до Алваро Мората и неговото семејство“

Уапсен тинејџер поради смртни закани до Алваро Мората и неговото семејство

Шпанската полиција уапси 19-годишен навивач од Малага, осомничен дека упатувал сериозни закани по животот на шпанскиот фудбалер Алваро Мората и членовите на неговото семејство, вклучително и неговите деца.

Инцидентот се случил по финалето на Лигата на нации, каде Шпанија загуби од Португалија по изведување пенали. Мората, кој не реализираше еден од ударите од белата точка, стана цел на навреди и закани на социјалните мрежи.

Полицијата утврди дека заканите биле испратени директно од личен профил на социјалните мрежи, управуван од тинејџерот. Иако осомничениот првично се обидел да се одбрани со тврдењето дека неговиот профил бил „хакиран“, истрагата открила спротивното – профилот не бил компромитиран и сите активности биле извршени токму од него.

Истражните органи, со анализа на електронските траги и приватните пораки од мобилниот телефон, потврдиле дека младиот човек е директно одговорен за заканите.

„Овој вид однесување за жал станува сè почест, особено во спортскиот свет, каде анонимноста на социјалните мрежи охрабрува одредени поединци да шират омраза и закани“, стои во официјалното соопштение на шпанската полиција.

Случајот повторно ја отвори дебатата за одговорноста на корисниците на интернет и неопходноста од посериозни последици за говор на омраза и закани преку дигитални платформи.