Јирген Клоп предупредува: Светското клупско првенство е катастрофална идеја – следната сезона не’ чекаат рекордни повреди!

Јирген Клоп жестоко за Клупскиот Мундијал: Најлошата идеја во историјата на фудбалот – следи бран повреди!

Поранешниот тренер на Ливерпул и сегашен шеф во Ред Бул остро го критикува новото Светско клупско првенство – „Играчите се на работ од колапс!“

Јирген Клоп, поранешен тренер на Борусија Дортмунд и Ливерпул, а сега шеф на светскиот фудбалски оддел на Ред Бул, во интервју за германскиот медиум „Ди Велт“ жестоко ја нападна идејата за Светското клупско првенство, кое се одржува во САД.

„Светското клупско првенство е најлошата идеја во историјата на фудбалот. Одлуки носат луѓе кои никогаш немале контакт со секојдневниот фудбалски живот. Слушам дека некои велат – да, тоа носи огромни пари. Но, тоа не важи за сите клубови“, изјави Клоп.n

Тој потсети дека фудбалерите се под неверојатен притисок:

„Минатата година имаа Копа Америка и Европско првенство, оваа година е Светското клупско првенство, а следната е Светското првенство. Играчите немаат време за закрепнување – ниту физички, ниту ментално.“

Клоп ја спореди ситуацијата со НБА:

„Во НБА, играчите имаат четири месеци одмор годишно. Вирџил ван Дајк никогаш во кариерата немал таков одмор. Не може клупскиот мундијал да се игра на сметка на здравјето на играчите. Сериозно сум загрижен.“

Според него, ситуацијата е алармантна:

„Ако не оваа сезона, тогаш на Светското првенство или по него ќе се случи – ќе има повреди какви што фудбалот не памети. Им велиме на играчите – секој натпревар да го играат како да е последен, и тоа 70-75 пати во годината. Тоа е неизводливо.“

Тој апелира дека мора да се преземат мерки:

„Играчите мора да добијат одмор. Без тоа, нема да можат да испорачуваат врвни перформанси. Ако се повредат или падне квалитетот, целиот фудбалски систем ќе изгуби вредност.“

На крај, Клоп порача:

„Се сеќавам кога имав само две и пол недели подготовки со комплетен тим – а потоа игравме на секои три дена цела сезона. Тоа е брутално и неодржливо.“