Тошковски: До средината на 2026 ќе го имплементираме „Безбеден град“ на територијата на целата држава

Министерот за внатрешни работи, Панче Тошковски, соопшти дека проектот „Безбеден град“ ќе биде воспоставен на ниво на целата држава до јуни или јули следната година, а до крајот на 2026 година ќе функционира во сите градови како комплетен „паметен систем“.

За време на денешното претставување на новата фотоволтаична централа во Центарот за обука на МВР, Тошковски нагласи дека граѓаните заслужуваат современо и ефикасно решение за поголема безбедност во сообраќајот, усогласено со европскиот план за „нула жртви“ до 2050 година.

Тој истакна дека е важно секој град – од Тетово и Скопје до Берово, Делчево, Струга и Охрид – да има модерна технологија која ќе помогне во намалување на сообраќајните несреќи и ќе спаси човечки животи.

Министерот потсети дека тестирањето на системот за регистрирање прекршоци ќе трае до 1 февруари следната година, при што веќе се забележуваат позитивни резултати. Во областите каде што проектот е активен има видливо намалување на бројот на несреќи и на случаи со тешки повреди.

Тошковски нагласи дека главната цел на проектот е заштита на човечки животи. Системот ќе важи за сите возачи, освен за службените возила на полицијата, брзата помош и противпожарните екипи, а како пример за еднаков третман, рече дека и самиот добил опомена за сообраќаен прекршок.