Минатата година македонската дијаспора во земјава уплатила околу 310 милиони евра

Toa претставува околу 2% од бруто домашниот производ (БДП). И покрај тоа што земјата бележи суфицит, податоците покажуваат намалување на личните дознаки во последните години — од 331 милион евра во 2022 година, на 319 милиони во 2023 и 310 милиони евра во 2024 година.

Во споредба со земјите од регионот, Србија предничи со дотации од 4,47 милијарди евра, по што следуваат Босна и Херцеговина (1,99 милијарди), Косово (1,32 милијарди), Албанија (1,28 милијарди) и Црна Гора (345 милиони евра).

Од земјите на Европската унија, Хрватска, Бугарија и Португалија се издвојуваат со позитивен биланс кај личните трансфери, додека Малта, Кипар, Белгија, Грција, Шпанија и Франција бележат дефицит.

Според „Евростат“, жителите на ЕУ во 2024 година испратиле 52,1 милијарди евра кон земји надвор од Унијата, што е зголемување од 6% во однос на 2023 година. Во исто време, приливот на дознаки во рамките на ЕУ изнесува 14,8 милијарди евра, што е пораст од 7%. Во последните пет години, одливот на лични пари пораснал за 51%, додека приливот расте поспоро — за 26%, што го зголемува негативниот биланс на ЕУ на 37,3 милијарди евра.