Трагедија го потресе фудбалскиот свет – Диого Жота, фудбалерот на Ливерпул, загина во сообраќајна несреќа.

Напаѓачот на Ливерпул и член на португалската национална селекција, Диого Жота, трагично го загуби животот во сообраќајна несреќа што се случи во Шпанија, потврдија тамошните власти. Во трагедијата, покрај 28-годишниот Жота, животот го загуби и неговиот помлад брат Андре, кој исто така беше професионален фудбалер.

Инцидентот се случил изминатата ноќ во провинцијата Замора, кога автомобилот „ламборгини“ со кој управувале браќата излетал од коловозот и се запалил.

„Според досегашните информации, несреќата се случила поради пукање на гума за време на претекнување, по што возилото ‘ламборгини‘ излетало од патот. Настанот се случил околу 1:30 часот по средноевропско време, во општината Сернадиља, во покраината Замора. Автомобилот се запалил, а двајцата патници починале“, информираше Шпанската цивилна гарда.

Англиските медиуми јавуваат дека Диого Жота неодамна, пред две недели, се оженил со својата долгогодишна партнерка Руте Кардосо, со која има три деца. Тој бил на одмор по завршувањето на сезоната во која му помогна на Ливерпул да ја освои својата 20-та титула.

Жота, роден во Порто, започнал да се занимава со фудбал на деветгодишна возраст, а во 2013 година станал дел од Пакош де Фереира, дебитирајќи во португалската лига во 2015. Следната година преминал во Атлетико Мадрид, кој го испратил на позајмица во Порто, а потоа и во Вулверхемптон. Во 2018 станал официјален играч на Вулверхемптон, а во 2020 се преселил во Ливерпул, каде што се истакна како еден од најопасните напаѓачи, постигнувајќи 47 голови во Премиерлигата.

Со Ливерпул настапи во финалето на Лигата на шампионите во 2022 година, а освои и ФА куп и Лига куп. За португалската репрезентација одигра 49 натпревари и постигна 14 голови, а со тимот ја освои Лигата на нации во 2019 и 2025 година.

„Фудбалскиот клуб Ливерпул е длабоко потресен од трагичната смрт на Диого Жота. Клубот е информиран дека тој и неговиот брат Андре го загубиле животот во сообраќајна несреќа во Шпанија. Во овој момент, клубот нема да дава дополнителни изјави и апелира до јавноста да ја почитува приватноста на семејството, пријателите и соиграчите на Диого и Андре додека се справуваат со оваа огромна загуба“, се вели во соопштението на англискиот шампион.