Хантавирусот повторно во фокусот: СЗО уверува дека ризикот од глобално ширење е низок

Светската здравствена организација предупреди дека хантавирусот повторно привлекува внимание по неодамнешните случаи регистрирани на крузер, но нагласува дека ризикот за пошироката јавност останува низок и нема простор за паника.

Според експертите, хантавирусот не се пренесува лесно од човек на човек како коронавирусот. Во најголем дел од случаите, инфекцијата се добива преку контакт со заразени глодари, нивна плунка, измет или урина, особено во затворени и слабо проветрени простории.

Од СЗО објаснуваат дека досегашните истражувања покажуваат оти пренос меѓу луѓе е исклучително редок и е забележан само кај одредени видови на вирусот, претежно во Јужна Америка, при долг и близок контакт меѓу заразени лица.

Хантавирусот може да предизвика сериозни симптоми, меѓу кои висока температура, болки во мускулите, главоболка, кашлица и проблеми со дишењето. Во потешки случаи може да дојде и до оштетување на белите дробови или бубрезите.

Светската здравствена организација потенцира дека во моментов нема потреба од ограничувања за патувања, ниту пак постои опасност од нова пандемија. Институцијата апелира граѓаните да одржуваат добра хигиена, да избегнуваат контакт со глодари и внимателно да чистат простории каде што постои ризик од нивно присуство.

Иако инфекциите со хантавирус се релативно ретки на глобално ниво, здравствените власти продолжуваат внимателно да ја следат состојбата и да ја информираат јавноста за евентуални нови случаи.