Јавниот превоз продолжува и покрај долговите на ЈСП

Граѓаните на Скопје денес повторно се соочија со доцнења на автобусите во градскиот превоз, особено во близина на „Рекорд“. Повторувањето на проблемот ги загрижи корисниците, кои стравуваат дека наскоро може да има целосен прекин на јавниот превоз поради најави за можен прекин во снабдувањето со гориво. Возачите алармираат дека ваквата ситуација трае веќе неколку години и бараат градските власти и ЈСП конечно да реагираат.

Сопственикот на „Пуцко Петрол“, Асмир Јахоски, потврди дека ЈСП има долг од 10 милиони евра за неплатени фактури во изминатите две години, поради што компанијата се соочува со финансиски предизвици. Сепак, Јахоски истакна дека, и покрај долговите, „Пуцко Петрол“ нема целосно да го прекине снабдувањето со нафта за да не бидат оштетени граѓаните на Скопје, но посочи и на неопходноста институциите одговорно да го менаџираат претпријатието.

Од Град Скопје информираа дека според постоечкиот договор испораките не треба да бидат суспендирани, но потенцираат дека е неопходно да се најде трајно решение со цел работењето на јавниот превоз да не зависи од поединечни одлуки на добавувачите.