„Кривична пријава за Фатмир Дехари: пријавен поранешниот градоначалник поради исплатени плати на лица што не оделе на работа“

Министерството за внатрешни работи поднесе кривична пријава против поранешниот градоначалник на Општина Кичево, Фатмир Дехари, поради сомнение за злоупотреба на службената положба и овластување. Ова следува откако беше откриено дека четири лица примале плата и надоместоци иако не оделе на работа, додека Дехари бил на функцијата.

Според соопштението на МВР, Дехари во периодот од 2021 до 2025 година, како градоначалник, склучил договори за вработување со четири лица, но потоа им дозволил да не присуствуваат на работните места, додека нивните плати и надоместоци продолжиле да се исплаќаат од општинскиот буџет. По истекот на законскиот рок, договорите не биле прекинати.

Полицијата наведува дека со ова постапување буџетот на Општина Кичево бил оштетен за околу 130.000 евра, додека четворицата вработени добиле противправна материјална корист, примајќи плати иако знаеле дека не ги исполнувале работните обврски.

Покрај Дехари, кривични пријави се поднесени и против четворицата вработени:

• Ф.А. (62) од село Зајас
• А.Н. (38) од село Србица
• Х.Б. (37) од село Црвевци
• Б.С. (36) од село Стрелци