Мицкоски: Македонија организира чартер летови за евакуација на граѓани од Дубаи, Катар и Кувајт

Премиерот Христијан Мицкоски соопшти дека Владата на Македонија работи на организација на чартер летови за евакуација на македонски државјани кои се наоѓаат во Дубаи, Катар и Кувајт, поради влошената безбедносна ситуација на Блискиот Исток.

Според информациите од Министерството за надворешни работи и надворешна трговија, повеќе стотици граѓани се обратиле до дипломатско-конзуларните претставништва за помош и информации околу нивно безбедно враќање во земјата.

Најголем број барања пристигнале од македонски државјани кои се наоѓаат во Обединетите Арапски Емирати, особено во Абу Даби, додека десетици граѓани побарале помош и од Катар и други земји во регионот.

Надлежните институции веќе работат на техничките и логистичките детали за организирање на чартер летовите, со цел граѓаните што побарале евакуација безбедно и навремено да се вратат во Македонија.

Министерството апелира сите македонски државјани кои се наоѓаат во погодените региони – Обединетите Арапски Емирати, Катар, Бахреин и Кувајт – доколку сè уште не го сториле тоа, да стапат во контакт со најблиското дипломатско-конзуларно претставништво или со СОС линијата на Министерството.

Евакуацијата ќе се реализира веднаш штом се создадат соодветни безбедносни и логистички услови, а институциите нагласуваат дека безбедноста на македонските граѓани е врвен приоритет.