Арсовска: Бев нападната со клоци пред очите на полицијата!

Безбедноста на носителите на јавни функции во Скопје е доведена под сериозен прашалник по денешниот физички напад врз градоначалничката Данела Арсовска. Инцидентот, кој се случи во општина Чаир, ескалираше кога тим на Град Скопје, предводен од градоначалничката, излезе на терен за да изврши увид по пријава за бесправно градење.

По лекарскиот преглед во болницата „Осми Септември“, Арсовска во изјава за медиумите го опиша нападот како брутален, тврдејќи дека била цел на удари, клоци и сериозни закани по живот, вклучително и закани за силување упатени кон неа и нејзиното семејство. Загрижувачки е фактот што, според нејзините зборови, целиот настан се одвивал пред очите на полициските службеници, кои не реагирале соодветно за да го спречат насилството.

„Наместо да го приведат напаѓачот, му дозволија половина час да упатува навреди и закани. Во нападот беа инволвирани и други лица, а жртви на вербални напади беа и секретарот на Градот и една советничка“, изјави Арсовска.

Случајот добива и дополнителна тежина со тврдењето на градоначалничката дека напаѓачот отворено комуницирал со лица во МВР, најавувајќи ги своите намери. Овој инцидент не е само физички напад врз еден поединец, туку претставува и аларм за загрозената безбедност и можен пример за политичко насилство кое ја поткопува довербата во институциите и владеењето на правото.