За неколку недели ќе исчезне некогаш најголемиот глечер на Земјата

Еден од некогаш најголемите глечери на планетата, познат како A23a, наскоро би можел целосно да исчезне, предупредуваат научниците. Огромниот леден блок, кој се одвоил од Антарктикот пред повеќе децении, со години се движи низ Јужниот океан и постепено се распаѓа.

Кога се одвоил од Филхнеровата ледена полица на Антарктикот, глечерот имал површина од околу 4.000 квадратни километри, што го правело еден од најголемите ледени брегови на Земјата. По одвојувањето, тој се насукал на морското дно во Веделовото Море, каде што останал заглавен повеќе од три децении.

Дури во 2020 година научниците забележале дека масивниот глечер повторно почнал да се движи. Оттогаш, под влијание на океанските струи и повисоките температури, ледениот масив постепено се распаѓа на помали делови.

Според експертите, постои голема веројатност A23a целосно да се распадне во наредните недели, додека неговите преостанати делови ќе се стопат во океанот. Иако ваквите ледени брегови не предизвикуваат директно зголемување на нивото на морето, нивното распаѓање е уште еден знак за драматичните промени што се случуваат на Антарктикот.

Научниците предупредуваат дека топењето на глечерите ширум светот се забрзува. Во последните години се регистрирани рекордни загуби на ледена маса, што е сериозен сигнал за влијанието на климатските промени врз планетата.