Обвинителството бара ефективен притвор за четворица осомничени за силување на 13-годишно девојче во Неготинско

Основното јавно обвинителство (ОЈО) Кавадарци донесе наредба за спроведување истражна постапка против четири лица, осомничени дека во февруари минатата година сториле тешко кривично дело врз 13-годишно девојче од Неготинско.

Како што информираат од Јавното обвинителство на Република Северна Македонија, осомничените се товарат за кривично дело „силување на дете кое не наполнило 15 години“, казниво согласно член 188 став 3 од Кривичниот законик.

Според досегашните сознанија, на 14 февруари 2025 година, осомничените по претходен договор со возило го зеле девојчето, со кое еден од нив бил во контакт, и го однеле на локација надвор од селото Криволак, во неготинскиот регион.

Во соопштението од Обвинителството се наведува дека сите осомничени имале сексуални односи со жртвата, при што таа била физички нападната и навредувана, по што била вратена назад во Неготино.

Во текот на претходната постапка, на осомничените им биле изречени мерки на претпазливост, но по формалното отворање на истрагата, јавниот обвинител побарал тие да бидат заменети со ефективен притвор.

Како причина за ваквото барање, Обвинителството наведува дека досега прибраните докази упатуваат на сериозно сомнение дека осомничените сториле кривично дело за кое е предвидена казна затвор од најмалку 10 години или доживотен затвор, што создава ризик од бегство или влијание врз постапката.

Судот треба да одлучи по предлогот на обвинителството во законски утврдениот рок.