Очистен локалниот пат кон село Видуше

Општина Маврово и Ростуше продолжува со активности за одржување на локалната инфраструктура, а денеска општинските служби со соодветна механизација работеа на расчистување на локалниот патен правец кон Видуше.

Поради временските услови, на оваа делница биле регистрирани одрони од земја и гранки кои виселе над патот, што го отежнувало движењето и претставувало опасност за учесниците во сообраќајот.

Екипите на терен целосно ги отстраниле наносите и паднатата земја од коловозот, а паралелно биле исечени и гранките кои ја намалувале видливоста и го попречувале нормалното движење на возилата.

Од Општината информираат дека редовното одржување на патната инфраструктура останува приоритет, со цел да се обезбеди безбедна и непречена комуникација со сите населени места во регионот.