Општина Маврово и Ростуше со донација од 3.000 литри вода за граѓаните на Гостивар.

На предлог на Градоначалникот м-р Онер Јакупоски, Советот на Општина Маврово и Ростуше донесе едногласна одлука за донирање на 3.000 литри вода за пиење, наменети за потребите на граѓаните на Општина Гостивар.

Со оваа одлука, сите советници и раководството на општината потврдија дека солидарноста се покажува преку дела и дека во тешки моменти мораме да бидеме поддршка за нашите соседи.

„Солидарноста и меѓусебното помагање се основните вредности врз кои го градиме нашето општество. Во моменти кога на нашите сограѓани од соседните општини им е потребна помош, наша должност и одговорност е да подадеме рака и да бидеме тука за нив“, истакна градоначалникот м-р Онер Јакупоски.

Општина Маврово и Ростуше ќе продолжи да ја негува соработката со сите околни општини и секогаш ќе биде подготвена да помогне во градењето на подобро, похумано и посолидарно општество.