Папа Лав XIV ги предупреди свештениците: Не користете ChatGPT за проповеди

Ватикан испрати јасна порака до свештениците – вештачката интелигенција не треба да се користи за пишување проповеди.

Папата Лав XIV во разговор со свештениците од Римската епархија нагласи дека духовната порака не може да се замени со технологија, особено кога станува збор за верата и личното искуство.

Тој ги повика свештениците да „ја избегнуваат искушението“ да користат алатки како ChatGPT при подготовка на проповедите, нагласувајќи дека вистинската проповед бара лично размислување, молитва и духовна поврзаност со верниците.

Според него, прекумерното потпирање на вештачката интелигенција може да доведе до губење на креативноста и способноста за критичко размислување.

„Како што мускулите слабеат ако не се користат, така и мозокот треба да се вежба“, истакнал папата, додавајќи дека вистинската проповед е повеќе од добро напишан текст – таа претставува споделување на верата.

Воедно, тој предупреди и на „илузијата на интернетот“, каде што лајковите и следбениците не се вистинска мерка за духовна вредност. Наместо тоа, свештениците треба да се фокусираат на автентична врска со заедницата и пренесување на вистинската порака.

Оваа изјава доаѓа во време кога вештачката интелигенција сè повеќе се користи во различни сфери, вклучително и религијата, што отвора нови прашања за нејзината улога и граници.