Помош за првачињата: 6.000 денари и училишен прибор во Маврово и Ростуше

Општина Маврово и Ростуше со парична помош и комплет школски прибор за сите првачиња.

Со почетокот на новата учебна година, Општина Маврово и Ростуше упатува искрени честитки до сите ученици, а посебно до оние кои за првпат ќе седнат во училишните клупи.

Согласно програмските определби и приоритети на Градоначалникот, м-р Онер Јакупоски, за поддршка на семејствата и унапредување на образованието, Општината за секое запишано прваче во сите општински основни училишта обезбеди:

Еднократна парична поддршка од 6.000 денари;

Училишен ранец со комплетен прибор за почеток на училишната година.

Оваа мерка има за цел да им овозможи олеснет почеток на семејствата во подготовките за училиште и да донесе радост кај најмладите при нивниот прв чекор во образовниот процес.

„Првачињата се нашата иднина и наша најголема радост. Наш приоритет е да им овозможиме подобри услови за учење и безбрижно детство. Со оваа поддршка сакаме да им посакаме успешен почеток и да им олесниме на нивните родители во овој важен момент“, истакна градоначалникот м-р Онер Јакупоски.

Општина Маврово и Ростуше им посакува среќен, успешен и исполнет со знаења почеток на новата учебна година на сите првачиња и на нивните наставници!