Жителите на Ростуше алармираат: Неконтролирани коњи и крави уништуваат имот и ја загрозуваат безбедноста

До редакцијата пристигнаа фотографии и видеа од загрижени граѓани од селото Ростуше, кои алармираат за сериозен и долгогодишен проблем со несовесно чување на животни. Според нив, коњи и крави во сопственост на жители од соседното село Жировница секојдневно се движат без надзор низ населеното место, предизвикувајќи материјални штети и загрозувајќи ја безбедноста на локалното население.

Жителите наведуваат дека животните редовно влегуваат во приватни дворови, ниви и обработливи површини. Како последица на тоа, се уништуваат земјоделски култури, тревници, огради и друга приватна сопственост, која е резултат на долгогодишен труд и вложување.

Според нивните тврдења, штетите не се изолирани случаи, туку се повторуваат континуирано, без да бидат преземени конкретни мерки од сопствениците на животните.

Покрај материјалната штета, граѓаните укажуваат и на реална опасност за безбедноста, особено за децата и повозрасните лица. Неконтролираното движење на крупни животни низ улиците и дворовите може да предизвика несакани инциденти и повреди.

Жителите тврдат дека и покрај бројните усни предупредувања и обиди за мирно решавање на ситуацијата, проблемот останува нерешен.

Во својата претставка, жителите на Ростуше бараат од надлежните институции да постапат согласно законските прописи и да преземат соодветни мерки за спречување на понатамошни штети.

Тие до редакцијата доставија и видео и фото докази кои, како што велат, јасно ја прикажуваат состојбата на терен.

„Се надеваме на брза и ефикасна реакција со цел конечно решавање на овој долгогодишен проблем и враќање на мирот и сигурноста во нашето село“, наведуваат жителите во своето обраќање.