Соработка за силна Горна Река: Фокус на патишта и развој на алтернативен туризам

Градоначалникот на Општина Маврово и Ростуше, Онер Јакупоски, одржа работна средба со претставници на Здружението за рурален развој „Дервени“ од Горна Река, на која се разговараше за приоритетите и идните чекори за развој на регионот.

Во фокусот на средбата беа тековните потреби на горнореканските села, со посебен акцент на подобрување на патната инфраструктура. Соговорниците се согласија дека квалитетната и безбедна патна мрежа е основен предуслов за задржување на населението, за поттикнување на локалната економија и за реализација на други капитални проекти.

„Без добра инфраструктура нема одржлив развој. Патиштата се темелот врз кој може да се градат сите други иницијативи“, беше истакнато на средбата.

Посебно внимание беше посветено и на можностите за развој на алтернативниот туризам. Горна Река, со својата недопрена природа, автентична архитектура и богато културно наследство, има потенцијал да стане атрактивна дестинација за туристи кои бараат мир, традиција и уникатно искуство.

Од Општината посочија дека ќе дадат поддршка на иницијативите насочени кон развој на руралниот туризам, планинарските патеки и заштитата на животната средина, како клучни столбови за долгорочен економски напредок на регионот.

Средбата заврши со заклучок дека заедничката соработка помеѓу локалната самоуправа и граѓанските организации е неопходна за создавање одржливи решенија и за враќање на животот во горнореканските села.