Конституиран Советот за развој на Полошкиот регион: Избран нов претседател и најавени клучни проекти

Конституиран е новиот Совет за развој на Полошкиот плански регион, со што започнува нов циклус на регионална соработка и реализација на значајни проекти.

На првата конститутивна седница присуствуваа градоначалници од повеќе општини, меѓу кои и Онер Јакупоски, градоначалник на Општина Маврово и Ростуше.

Во согласност со принципот на ротација, за нов претседател на Советот беше избран Блерим Сејдиу, градоначалник на Општина Желино, кој ќе ја извршува функцијата во текот на оваа година.

Јакупоски упати честитки до новиот претседавач, посакувајќи му успешна работа во координацијата на регионалните активности и проекти.

Покрај изборот на претседател, на седницата беа разгледани и повеќе важни прашања од заеднички интерес, насочени кон забрзување на развојот на Полошкиот регион.

Како еден од клучните проекти беше издвоена изградбата на современо прифатилиште за бездомни кучиња. Овој објект ќе биде реализиран според европски стандарди и има за цел трајно и хумано решавање на проблемот со бездомните животни во регионот.

Претставниците на општините нагласија дека меѓуопштинската соработка останува клучен фактор за обезбедување финансиски средства и успешна реализација на проекти кои директно го подобруваат квалитетот на живот на граѓаните.