Успешно затворено Светското првенство во риболов на крап во Маврово

Украина е нов светски првак.

Со свечена церемонија и доделување на медалите на најдобрите, официјално заврши Светското првенство во риболов на крап, на кое Општина Маврово и Ростуше беше коорганизатор заедно со Македонската риболовна федерација.

На завршната церемонија присуствуваше Градоначалникот на Општина Маврово и Ростуше, м-р Онер Јакупоски, кој им ги честиташе постигнатите резултати на најуспешните тимови меѓу повеќе од 30-те светски репрезентации кои ги одмерија своите сили на Мавровското Езеро.

Победничкиот пиедестал на ова престижно светско натпреварување го зазедоа:

1. Место (Златен медал): Репрезентацијата на Украина

2. Место (Сребрен медал): Репрезентацијата на Унгарија

3. Место (Бронзен медал): Репрезентацијата на Литванија

Градоначалникот Јакупоски изрази благодарност до сите учесници, организатори и гости кои придонесоа за беспрекорната организација на овој голем спортски настан.

„Упатувам искрени честитки до сите репрезентации кои зедоа учество на ова Светско првенство, а посебно до најдобрите, тимовите на Украина, Унгарија и Литванија за нивниот врвен спортски успех.

Беше огромна чест и задоволство да се биде домаќин на ваков грандиозен собир.

Се надевам дека од Маврово и нашата општина понесовте прекрасни спомени, новородени пријателства и моменти кои долго ќе ги помните.

Вратите на Маврово и Ростуше остануваат ширум отворени за сите вас!“, истакна градоначалникот м-р Онер Јакупоски.

Општина Маврово и Ростуше уште еднаш ги потврди своите капацитети за организација на меѓународни настани од највисок ранг, промовирајќи го регионот како врвна дестинација за спортски и алтернативен туризам.