Општина Маврово и Ростуше бара долгорочно решение за водоснабдувањето во Врбен и Беличица

Општина Маврово и Ростуше продолжува со активности насочени кон подобрување на инфраструктурата и условите за живот во руралните населени места.

Градоначалникот М-р Онер Јакупоски, заедно со директорот на ЈПКД Маврово, Ристе Попоски, извршија теренска посета на Врбен и Беличица, каде беше направена обиколка на постојните каптажи и беше разгледана актуелната состојба со водоснабдувањето.

Во разговорите со мештаните биле истакнати долгогодишните проблеми и предизвици поврзани со недостигот на вода, при што жителите побарале посериозни и долгорочни решенија за обезбедување стабилно и квалитетно водоснабдување.

Како една од можните мерки за надминување на проблемот, била разгледана можноста за изградба на нови резервоари за вода, кои би овозможиле подобро управување со водните ресурси и посигурно снабдување за жителите на овие села.

Од Општината посочуваат дека решавањето на инфраструктурните предизвици останува приоритет, со цел создавање подобри услови за живот и рамномерен развој на сите населени места во регионот.